مقدم في بنك مصر.. وعاوز تعرف ايه المشوار !!

مقدم في بنك مصر.. وعاوز تعرف ايه المشوار !!

بسم الله الرحمن الرحيم.. والصلاة و السلام على اشرف خلقه و المرسلين صلى الله عليه و سلم..طبعا يا شباب فيه كتير قدمو في بنك مصر.. واكيد لسة اكتر حيقدمو..طيب وايه الكلام .. ايه اللي حيحصل بعد التقديم ؟؟؟انا ححاول كده اقولكم ايه اللي حصل معايا.. من اول مامليت الابليكشن .. لحد ماستلمت الشغل..في الاول طبعا.. رحنا و ملينا الابليكشن..وقالوكم هناك.. حنتصل بيكم بعد شهر و لا شهر و نصف.. تمام..ممكن يتصلو بيكم.. وممكن لأ.. ماتقلقوش.. ده شغل الروتين بقى..بالنسبة لي اتصلو بيا بعد 3 شهور تقريبا.. و يمكن اكتر..بعد ماكنت نسيت اني مقدم اساسا..جالي الجواب على البيت.. بيقولي اجهز علشان فيه امتحان بعد 3 ايام من تاريخ استلامي الجواب..وعلى فكرة.. الامتحان كان سهل و بسيط.. ولاهو مكلكع و لاحاجة..كان حوالي 200 سؤال اختيار من متعدد وزمن الامتحان كان 3 ساعات..في الاول كده بيكون فيه حوالي 70 سؤال كده محاسبة على اقتصاد على تسويق.. كوكتيل كده..بالنسبة للمحاسبة.. معظم الاسألة عن اساسيات المحاسبة.. يعني عن المعادلة الاساسية بتعاة الاصول و الخصوم دي..ممكن كمان حتة عن ايرادات و مصروفات.. سؤال كده عن نوع التزام معين.. يجيبلك حاجة صغيرة ناقصة في الميزانية..وكلها اسألة سهلة جدا والله و كلها اختيارت من متعدد..ونفس الكلام عن الاقتصاد.. بتكون معظم الاسألة عن العرض و الطلب.. مرونة.. كده يعنيوالتسويق بيكون ف الغالب عن عناصر المزيج التسويقي..بعد كده فيه جزء بتاع 15 سؤال ولا حاجة Iq وبالعربي كمان.. عاوزين ايه اكتر من كده..اسألة ماينفعش يتقال عليها اكتر من انها اسألة هبلة..كلها اسألة منطقية.. يادوب تقرا السؤال مرتين كده ولا حاجة.. حتلاقيه بيجاوب نفسه..وفيه برضه حوالي 10 ولا 15 سؤال ف المعلومات العامة..زي مثلا مصري نال على جائزة نوبل مناصفة.. مين هو مؤسس بنك مصر..كام مرة مصر فازت ببطولة الامم الافريقية.. وحاجات زي كده يعنيوبعد كده فيه شوية اسألة انجليزي في اللذيذ يا حلوين..ولا عاوزين تشتغلو في بنك من غير ماتكونو بتعرفو انجليزي ولو شوية صغنتتين.. منظرة يعني ..بيكون شوية اسألة جرامر و فوكاب كده.. وبرضه اخيار من متعدد.. وعلى فكرة حتلاقي الحاجات دي شبه الحاجات اللي اخدتها في اعدادي.. ايام Abc وبعد كده حتتين ترجمة ع السريع.. واحدة عربي و التانية انجليزي..وفي الاخر خالص حتلاقي اربع مواقف كده..مثلا انت بتشتغل في حاجة معينة و عميل سألك انك تقضيله خدمة.. حاتعملها؟؟ ولا مثلا زميل لك قصدك في اداء جزء من مهامه.. حتعمل ايه ؟؟النفروض انك تحط نفسك في كل موقف و تقول انك موافق ولا مش موافق و ليه.. تشرح بقى انت قلت موافق و لا مش موافق على اي اساس تمام لحد كده ..

-----------------------------------------------

خلاص بقى نجحنا في الامتحان و الحمد لله.. (ف الغالب حتعرف النتيجة بعد شهر تقريبا)حيتححدلك ميعاد مقابلة ..تتشيك كده و تلبس البدلة اللي مافيش غيرها ف الدولاب..وتظبط نفسك كده و تتشيك.. وتروح واثق من نفسك يا مان..النظام هناك بيكون 3 بيدخلو مع بعض.. واللي بيعملك المقابلة برضه 3في الاول بيكون الموضوع عبارة عن دردشة صغيرة كده.. بيعرف عنك كام حاجة عن شخصيتك.. عن وظيفتك لو كنت شغال قبل كده.. لانه حيسألك ساعتها عن مجال وظيفتك.. سؤالين كده ولا حاجة متعلقين بوظيفتك دي..اما بقى لو كنت رايح عاطل-زي حلاتي كده- فبيعرف منك من الدردشة دي انت كنت بتحب مواد ايه ايام الكلية وايه المواد اللي جبت فيها اعلى تقدير,,و يقوم سألك سؤالين عنها كده..والاسألة المعتادة طبعا.. ايه الفرق بين الموازة و الميزانية..المخصص و الاحتياطي .. الاسهم و السندات.. اعتمادات مستندية و خطابات الضمان.. كده يعني بعد كده بقى.. يشوف ايه نظام المعلومات العامة عندك..يسالك مثلا عن عاصمة ولا حاجة.. عملة البلد الفلاني ايه.. مين هو وزير المالية.. حاجات كده يعني...وطبعا حاشرلك كالعادة حتة انجليزي,,ف الغالب حيقلك قدم نفسك بالانجليش.. شوف انت بقى اخر حاجة ف الانترفيو و يقلك قدم نفسك.. بس تقول ايه بقى..بلد...صحيح :)))

--------------------------------------------------------

وبعد شهر كده ولا شهر و نص تاني..حيجيلك الجواب المزعوم..فيه انك نجحت ف الانترفيو ولمفروض حضرتك تروح تاني الفرع الرئيسي ده اللي في شارع محمد فريد..بس المرة دي معاك شوية حاجات كده:

10صور شخصية

اصل شهادة المؤهل

اصل شهادة الجيش

اصل شهادة الميلاد كمبيوتر

صحيفة الحالة الجنائية باسم بنك مصر

خطاب القوى العاملة

مايثبت القيد في نقابة التجاريين

ومبروك بقى حتمضي العقد..وماتنساش سعادتك كمان تشرف صايم علشان الكشف الطبي..ومبروك يا معلم..واهلا بك عضو في بنك مصر..

"ومعا نعمل لخير بلدنا"

بنك مصر

بس كلمة حق لوجه الله.. البنك فيه روتين جامد لانه بنك قطاع عام

وبالتوفيق كلكم ان شاء الله